قصيد في الشعر الملحون
من وحي ماساة العاملات الفلاحيات اللواتي قضين في حادثة السبالة
رحلت مولاة الفولارة
رحلت مولات الفولارة
مولات الحولي كركار
و خلتها الفولارة شارة
شامة على جبين الدوار
خوذو بثاري ها نغارة
و يا ربي ماك النغار
خوذ بثاري من الثرثارة
الي شدوا المجلس في حوار
دفنونا و سكنوا في عمارة
و نا عندي باب بلا دار
عندي من الذرية حارة
عشتهم بعدي بلا ستار
و الي يحكم وولفيدو شارة
طنڨرها عزبة و أسوار
نجري على الخبزة غدارة
و هوما البريوشة في كار
و يا تونس حكموك سكارة
غدارة عبدوا الدينار
و عملوا من ربي تجارة
باعوا تونس بالمليار
و خلونا نعانوا حڨارة
حڨرونا تحرڨهم نار
بلاد الحكموها سمسارة
السارق يشكر في السمسار
سفينة خلوها بلا منارة
و جابوا كريطة و دعثار
ها تونس ويني الحضارة
و يني نسورك في الاوكار
ولا ڨتلوها السحارة
الي لبسو جبة و خمار
و نا ظني دخلوا الخمارة
سكروا و طاروا من المطار
سكرهم صاحب المهارة
شايب زطلها الأحرار
سكرهم ركبوا العبارة
غرڨهم في عباب بحار
و ممبعد يخرج في صورة
مزينها اعلام العار
هذا تايب عامل شورة
و هذا بنخلة عندو قرار
و هذا ينوم شعب الكورة
جاهز منقذ من الأخطار
الحصيلو سوڨ. و تجارة
و سياسة خمج و تجار
و الزوالي بين ذكورة
كورة يشوطوها الشطار
كيف تڨلوا راهي الحارة
ولات بسومة الأحيار
يعرڨ يكبسلك سنطورة
يتكوبس هاك البندار
يبدى يقري بلا سبورة
يلڨى لأسيادو الأعذار
تبقى وحدك وسط الدورة
تعيط و تنادي بلا جار
تولي شاعر عندك صورة
و عندك عالم فيه أسحار
تكلم في حروفك باشارة
العوج ينطق الأحجار
و نا يحياوي من النغارة
نسوڨ و منعدل رادار
كلامي مسترسل في غارة
جبت قصيدة للصنصار
هاك الخرافة البندارة
الخرباڨ يحب الغوار
و نا حسيني نلعب سكارة
آش على كلاب البهبار
لا يلڨى هف و لا حجارة
باش يلعب حتى مشوار
شاعر ماهر عندي مهارة
وراثة من جدودي الأحرار
نرحع نستغفر بطهارة
متوضي مصلي الأفجار
و نسبح باسمك في السورة
يا ربي أنت الستار
ارحم و اكرم للمغفورة
المرحومة أم الفولارة
كفنها حوليها الكركار .
**************
المصدر
من صفحة حرشاني ناس ملاح
إرسال تعليق